Ақтөбелік кәсіпкерлер көне археологиялық ескерткіштерді сақтап қалуға ат-үсті қарағаны үшін айыппұл ретінде миллиондаған қаржы төлеуі мүмкін. Бұл жөнінде Ақтөбе облыстық тарихи-мәдени мұраларды қорғау жөніндегі мемлекеттік инспекциясы ескертпе жасады.
Ресми органның мәліметінше, соңғы жылдары өңірде ескерткіштер мен қорғандарды бұзу дерегі жиіленіп кеткен. Оған жеке кәсіпкерлердің тарихи-мәдени мұра ескерткіштері бар жер учаскелерінде егіс алқабын жырту, құрылыс материалдары үшін құм-тас карьерлерін ашу мен жол салу жұмыстары себеп болып отыр. Осының нәтижесінде облыстағы 659 ескерткіштің 100-ге жуығы жойылып кеткен. Олардың ішінде тас және қола дәуірінен қалған көне қорғандар да бар.
Фархад Досмұратов, Ақтөбе облыстық тарихи-мәдени мұраларды қорғау жөніндегі мемлекеттік инспекциясының бас инспекторы:
"Жер игерушілер, оның ішінде жауапкершілігі шектеулі серіктестіктер бар, керстянский хозяйстволар бар, солардың жасап отырған, пайдаланып отырған жерлерін тексеріп, ол жерде қорған бар ма, тарихи-мәдени ескерткіштер бар ма, соны анықтауға болады. Сонымен олар жерді игеріп жатқан кезде ана ескерткіштерді дұрыс қарамай, зиян келтіріп жатқан жағдайда оларға үлкен 200 мың МРП айппұп салынады оларға".
