Кәсіпқой бокстағы жарық жұлдыздарымыздың бірі Жанат Жақияновтың командасы WBA және IBF тұжырымдарына арызданыпты. Бұған Жанаттың соңғы жекпе-жектегі қарсыласы, британдық Райан Барнеттің допинг-бақылаудан өтпегені себеп болыпты. Бұл жөнінде қазақ боксшысының менеджері Филипп Фондю "World Boxing News" басылымына берген сұхбатында мәлімдеген.
Өздеріңіз білесіздер, 21 қазан күні әртүрлі тұжырымдағы әлем чемпиондары Жанат Жақиянов (27-2, 18 КО) және Райан Барнетт (18-0, 9 КО) өз белбеулерін ортаға салып, екі чемпиондық атақ үшін таласты. 118 фунт (53,52,5 келі) салмақ дәрежесіндегі 12 раундтық тең дәрежеде өткен жекпе-жекте Солтүстік Ирландия боксшысы төрешілер шешімімен жеңіске жеткен болатын.
Алайда оның Белфастағы осы жеңісі күдік туғызып отыр. Себебі ол жекпе-жек аяқталысымен допинг-сынақтан өтпей, емханаға тартқан. Бұдан кейін оның қандай да бір жарақат алғаны жөнінде мәлімет болған жоқ.
Бүгінде оның бірден емханаға тартып кетуіне күмән келтірушілер бар. Өйткені Райан Барнетт допинг-бақылаудан өтпеген. Бұл – көпе-көрнеу жалтару. Бір шикіліктің болуы да ғажап емес. Ал чемпиондық атақтар сарапқа салынатын жекпе-жектерде боксшылар міндетті түрде допинг-сынақтардан өтулері керек. Бұл тіпті жекпе-жек келісімшартында да көрсетіледі.
"Біз IBF және WBA тұжырымдарына шағымдандық. Себебі Барнетт міндетті допинг-бақылаудан өтпеген. Аталған ұйымдар бізге жауап береді деп үміттенеміз. Өйткені біз неліктен допинг-сынақ өткізілмегендігін білгіміз келеді", – депті Филипп Фондю.
Естеріңізге сала кетейік, WBA тұжырымы бойынша әлем чемпионы Жанат Жақиянов қазан айының аяғында IBF тұжырымы бойынша әлем чемпионы Райан Барнеттен ұтылып, белбеуінен айырылып қалған болатын.
Маруан Түсіп
